Amdanom ni
Mae Gweithredu dros
Blant wedi ymrwymo i helpu'r plant a'r bobl ifanc yng Nghymru sydd
fwyaf agored i niwed ac sydd wedi eu hesgeuluso, i oresgyn
anghyfiawnder, amddifadedd ac anghydraddoldeb fel y gallant
gyflawni eu potensial yn llawn.
Mewn partneriaeth â'r Eglwys Fethodistaidd, rydym wedi bod yn
cefnogi ac yn gweithio gyda'r plant mwyaf agored i niwed ac sydd
wedi eu hesgeuluso, a hynny am 140 o flynyddoedd ar draws y DU ac
am 100 o flynyddoedd yng Nghymru.
Cawsom ein sefydlu ym 1869, dan yr enw 'Cartref i Blant
Cenedlaethol' (National Children's Home) yn wreiddiol. Ond ym
mis Medi 2008, newidiwyd ein henw i un sy'n disgrifio ein
gwerthoedd a'r hyn rydym yn ei wneud yn well - Gweithredu dros
Blant.
Rydym yn gweithio gyda bron i 12,000 o blant, pobl ifanc a'u
teuluoedd drwy 123 o wasanaethau ar draws 45 o brosiectau yng
Nghymru.
Heddiw, rydym yn un o'r prif ddarparwyr gwasanaethau yng
Nghymru. Rydym yn cynnig gwasanaethau maethu a seibiannau byr,
gwasanaethau i blant anabl a'u teuluoedd a chefnogaeth i bobl ifanc
sy'n gadael gofal.
Mae ein gwirfoddolwyr yng Nghymru yn codi arian drwy ddigwyddiadau
a nawdd gan gwmnïau.
Mae ein gweledigaeth yn cynnwys byd lle mae'r holl blant a phobl
ifanc yn meddu ar ymdeimlad o berthyn ac yn cael eu caru a'u
gwerthfawrogi, yn llywio eu ffawd eu hunain ac yn mwynhau pleserau
bywyd.
Ein gwerthoedd
Angerdd - ein dymuniad i gynorthwyo plant a
phobl ifanc i oresgyn anghyfiawnder ac anfantais sy'n ein
hysgogi
Cydraddoldeb - rydym yn credu bod pob un
plentyn a pherson ifanc yn gydradd o ran gwerth ac yn meddu ar
hawliau cyfartal
Gobaith - rydym yn credu ym mhotensial plentyn
neu berson ifanc, pa beth bynnag y maent wedi ei brofi neu'r hyn y
maent wedi ei wneud
Cenhadaeth weithredol
Mae Gweithredu dros Blant yn diwallu anghenion y plant a'r bobl
ifanc hynny mae gwir angen cymorth arnynt er mwyn cyflawni eu
potensial llawn. Drwy ein gwaith a drwy siarad yn gyhoeddus, rydym
yn ceisio chwalu'r cylch o amddifadedd. Rydym yn herio
anghyfiawnder ac yn galluogi plant i oresgyn y rhwystrau yn eu
bywydau sy'n eu dal yn ôl. Rydym yn teilwra ein gwaith i
amgylchiadau lleol, mewn partneriaeth â phlant a phobl ifanc,
teuluoedd, cymunedau a mudiadau lleol.
Rydym yn gweithio gyda phlant a phobl ifanc:
- y mae angen cymorth ar eu teuluoedd
- nad ydynt yn gallu byw gyda'u teuluoedd naturiol
- sy'n anabl
- sy'n profi trafferthion difrifol yn eu bywydau